కరోనా మందు రెమ్‌డెసివిర్ స్టాక్‌‌ మొత్తాన్ని కొనేసిన అమెరికా!
Advertisement .a
కరోనా చికిత్సలో ఉపయోగపడుతున్న 'రెమ్‌డెసివిర్‌' డ్రగ్‌ స్టాక్‌ మొత్తాన్ని అమెరికా కొనేసింది. దీంతో మూడు నెలల వరకు అమెరికా నుంచి ఇతర దేశాలకు ఈ ఔషధం అందదు. అమెరికాకు చెందిన బయో ఫార్మా సంస్థ గిలీడ్‌ సైన్సెస్‌ ఈ ఔషధాన్ని అభివృద్ధి చేసింది.

'అమెరికా ఫస్ట్' అనే నినాదంతో ముందుకెళ్తున్న ఆ దేశ అధ్యక్షుడు ట్రంప్‌ తీరుకి అనుగుణంగా ఆ సంస్థ అమెరికాకే మొదట డ్రగ్ స్టాక్‌నంతా ఇవ్వనుంది. దాదాపు ఐదు లక్షల డోసులకు అమెరికా ఆర్డర్లు ఇచ్చింది. ‌ఈ నెల ఆ సంస్థ  ఉత్పత్తి చేసే 100 శాతం డోసులు, ఆగస్టులో ఉత్పత్తి చేసే 90 శాతం, సెప్టెంబరు నెల ఉత్పత్తిలో 90 శాతం డ్రగ్‌ అమెరికాకే ఇవ్వనుంది.

అమెరికన్లకు ఆ డ్రగ్‌ అందుబాటులో ఉండేందుకు డొనాల్డ్‌ ట్రంప్‌ ఆ సంస్థతో ఒప్పందం చేసుకున్నారని అమెరికా వైద్యశాఖ మంత్రి అలెక్స్‌ అజార్‌ ప్రకటించారు. కాగా, ఈ డ్రగ్స్‌ విషయంలో అమెరికా ఏకపక్షంగా తీసుకుంటున్న ఈ నిర్ణయాల వల్ల ప్రపంచ దేశాలకు మందు లభించదని లివర్‌పూల్‌ వర్సిటీ శాస్త్రవేత్త డాక్టర్‌ ఆండ్రూ హిల్‌ ఆందోళన వ్యక్తం చేశారు.

ఎబోలా వైరస్‌ చికిత్స కోసం ఈ రెమ్‌డెసివిర్‌ను గతంలో అభివృద్ధి చేశారు. అప్పట్లో సుమారు 1.40 లక్షల డోసులను పరీక్షల కోసం పలు దేశాలకు పంపిణీ చేశారు. ఈ డోసులన్నింటినీ ఆయా దేశాలు ఇప్పటికే వాడాయి. కరోనా చికిత్స కోసం మొత్తం ఆరు రెమ్‌డెసివిర్‌  డోసులను రోగులకు ఇవ్వాల్సి ఉంటుంది.

ఆ డ్రగ్‌కు పేటెంట్‌ హక్కులున్నాయి. లైసెన్సు పొందిన సంస్థలు మాత్రమే ఈ మందును తయారు చేస్తాయి. ఈ డ్రగ్‌ను విస్తృతంగా అందుబాటులోకి తీసుకురావడం కోసం గిలీడ్‌ సైన్సెస్‌ భారత్‌కు చెందిన కొన్ని జనరిక్‌ ఫార్మా సంస్థలతోనూ ఇప్పటికే‌ ఒప్పందాలు కుదుర్చుకుంది.

సిప్లా, హెటెరో ల్యాబ్స్‌తో పాటు పలు సంస్థలతో ఒప్పందం కుదిరింది. భారత్‌తో పాటు ప్రపంచంలోని 127 దేశాల్లో ఈ డ్రగ్‌ను విక్రయించే అవకాశం భారత సంస్థలకు లభించింది. డగ్ర్‌ తయారీకి కావాల్సిన సాంకేతిక పరిజ్ఞానం గిలీడ్‌ నుంచి భారతీయ సంస్థలకు బదిలీ అవుతుంది. ఇప్పటికే భారత్‌లోని ఆ రెండు సంస్థలకు డ్రగ్‌ కంట్రోలర్‌ జనరల్‌ ఆఫ్‌ ఇండియా అనుమతులు ఇచ్చింది.
Thu, Jul 02, 2020, 11:15 AM
ఈ వార్తను గ్రూప్ లో షేర్ చేయండి
Do you hate Fake News, Misleading Titles, Cooked up Stories and Cheap Analyses?... We are here for YOU: Team ap7am.com
Advertisement .b
Advertisement .b
Copyright © 2020; www.ap7am.com
Privacy Policy | Desktop View