బ్రిటిష్ ఎయిర్ వేస్ పై హ్యాకర్ల పంజా.. 3.8 లక్షల క్రెడిట్ కార్డుల సమాచారం తస్కరణ!
Advertisement
ప్రముఖ విమానయాన సంస్థ బ్రిటిష్ ఎయిర్ వేస్ కు హ్యాకర్లు షాకిచ్చారు. కంపెనీ వెబ్ సైట్, మొబైల్ యాప్స్ పై దాడిచేసిన హ్యాకర్లు 3.8 లక్షల క్రెడిట్ కార్డుల వివరాలను చోరీ చేశారు. అంతేకాకుండా ఈ యాప్స్ ద్వారా టికెట్ బుక్ చేసుకున్న ప్రయాణికుడి పేరు, ఈ మెయిల్ ఖాతా వివరాలు మొత్తం హ్యాక్ చేశారు. ఆగస్టు 21 నుంచి సెప్టెంబర్ 5 మధ్యలో ఈ వ్యవహారం చోటుచేసుకుంది. తాజాగా తమ ప్రమేయం లేకుండానే క్రెడిట్ కార్డును వాడినట్లు పలువురికి మెసేజ్ లు రావడంతో ఈ హ్యాకింగ్ ఉదంతం వెలుగులోకి వచ్చింది.

ఈ విషయమై బ్రిటిష్ ఎయిర్ వేస్ సీఈవో అలెక్స్ క్రూజ్ మాట్లాడుతూ.. తమ కంపెనీపై సైబర్ దాడి జరిగిన మాట వాస్తవమేననీ, దాదాపు 3.8 లక్షల మందికి సంబంధించిన వ్యక్తిగత వివరాలు, క్రెడిట్ కార్డుల సమాచారం హ్యాకర్ల చేతికి చిక్కిందని వెల్లడించారు. ఈ ఘటనపై బ్రిటిష్ నేషనల్ క్రైమ్ ఏజెన్సీకి ఫిర్యాదు చేశామనీ, వారు ప్రస్తుతం దర్యాప్తు చేస్తున్నారని క్రూజ్ పేర్కొన్నారు. ఆగస్టు 21 నుంచి సెప్టెంబర్ 5 వరకూ తమ వెబ్ సైట్, యాప్స్ నుంచి క్రెడిట్ కార్డు ద్వారా టికెట్ బుక్ చేసుకున్నవారు వెంటనే తమ కార్డులను బ్లాక్ చేయాలని సూచించారు.
Sat, Sep 08, 2018, 10:22 AM
Copyright © 2018; www.ap7am.com
Privacy Policy | Desktop View